Гиннестин рекорддор китебине кирген дүйнөдөгү эң кичинекей эстелик тыйындар

Алтын куна

2022-жылы Хорватиянын тыйын сарайы 999 үлгүсүндөгү алтын тыйын чыгарды, анын номиналы 1 хорват кунасы болуп саналат. Монетанын диаметри 1,99 мм, ал эми салмагы - 0,05 грамм. Бул тыйын расмий түрдө дүйнөлүк рекорд коюп, эң кичинекей эстелик тыйын катары Гиннестин рекорддор китебине кирген.

2023-жылдан баштап Хорватия евро валютасына өтсө да, мурдагы акча системасын унутта калтырбай келет.  

Тыйындын алдыңкы бетинде Хорватиянын Хум шаары куштун көзү менен тартылган. Аталган шаар да Гиннестин рекорддор китебине дүйнөдөгү эң кичинекей шаар катары кирген. Бул шаарда, ар түрдүү маалыматтарга караганда 30-50дөй адам жашайт, ал эми шаар аймагы 13 чарчы чакырымды түзөт. Калаа өзүнүн уникалдуу атмосферасы жана тарыхый мааниси менен белгилүү. Мындан улам бул жер тургундар жана туристтер үчүн сүйүктүү жерге айланган.

Тыйындын арткы бетинде Истрия букасынын башы тартылган. Бул уникалдуу жаныбар аймактын белгиси болуп саналат, анткени ал бир гана Истрия жарым аралында кездешет. Анын сүрөтүн Хумдун шаардык дарбазасынан да көрүүгө болот.

Тыйындар автоматташтырылган пресс аркылуу чыгарылып, гравюранын жасалышы үчүн лазер колдонулган. Процесс Гиннестин рекорддор китебинин сотунун көзөмөлүндө болгон.

Альберт Эйнштейн

Буга чейинки Гиннес рекордун 2020-жылы Швейцария монеталык сарайы тарабынан немис физиги, заманбап теориялык физиканын негиздөөчүсү, салыштырмалуу теориянын, кванттык жана фотоэффект теорияларынын автору Альберт Эйнштейнге арналып чыгарылган миниатюрдык швейцариялык алтын тыйыны койгон.

Алтын кунага салыштырмалуу тыйындын диаметри 2,96 мм жана салмагы 0,063 грамм. Өзүнүн кичинекей өлчөмүнө карабай, тыйындын алдыңкы жана арткы бети машиналык жол менен чыгарылган. Алдыңкы бетинде физика боюнча Нобель сыйлыгынын лауреаты Альберт Эйнштейндин тили чыгып турган абалдагы сүрөтү чагылдырылган. Артында тыйындын номиналдык баасы, «Гельвеция» жазуусу, швейцариялык крест, үлгүсү жана салмагы көрсөтүлгөн.

Швейцариянын тыйын сарайы бул тыйындан 999 даанасын чыгарган, алар коллекционерлер тарабынан дароо сатып алынган.

Тыйын сарайынын өкүлдөрү мындай нумизматикалык чыгармачылыктын жаралуусуна Эйнштейн түрткү болгонун, ал жашоосунун көпчүлүгүн Швейцарияда өткөргөнүн айтып беришкен.