1% өлчөмүндөгү салык 110 миңден ашык жумушчуну көмүскөдөн чыгарууга жардам берди

Бул тууралуу Мамлекеттик салык кызматынын төрагасынын орун басары Кубанычбек Ысабеков Жогорку Кеңештин комитетинин жыйынында билдирди.

Анын айтымында, буга чейин көптөгөн таксисттер менен курьерлер көмүскөдө иштеп келишкен, бирок алар үчүн жеңилдетилген салык ставкасы киргизилгенден кийин салык салуунун жөнөкөйлөштүрүлгөн тартиби колдонула баштаган.

«Азыр расмий иштегендердин саны 110 миңден ашты», - деп белгиледи Ысабеков.

Тигүү тармагынын кызматкерлери үчүн да киреше салыгы 1%га чейин төмөндөтүлгөн. Мында салык иш жүзүндөгү эмгек акыдан эмес, белгиленген орточо эмгек акыдан эсептелет.

«Муну иш жүзүндө салыктан бошотуу деп атаса болот», - деди МСКнын  төрагасынын орун басары.

Мындан тышкары, ден соолугунун мүмкүнчүлүгү чектелген адамдар үчүн киреше салыгынын ставкасы 10%дан 5%га чейин төмөндөтүлгөн.

Бул чаралар чет өлкөлүк окутуучуларга жана билим берүү мекемелерине салык жеңилдиктерин берүүнү караган мыйзам долбоору талкууланып жатканда комитеттин жыйынында каралды.

Депутат Улан Примов жеңилдиктерди тандалма түрдө берүү зарылдыгын белгиледи. Анын пикиринде, биринчи кезекте Кыргызстанда жетишсиз болгон адистерге жеңилдиктер берилиши керек. Ошондой эле салык жеңилдиктеринин эсебинен билим берүү мекемелеринде үнөмдөлгөн каражаттар жабдууларды сатып алууга жана окутуучулардын квалификациясын жогорулатууга жумшалышы зарыл.

Мыйзам долбоорунун автору Алтынбек Кудайбердиев жеңилдиктерди интерактивдүү такталарды жана компьютерлерди кошкондо, зарыл болгон окуу жабдууларын сатып алууга пайдалануу сунушталып жатканын түшүндүрдү.

Буга чейин 2025-жылдын 1-сентябрынан тартып агрегаторлор аркылуу иштеген таксисттер жана курьерлер үчүн салык жана камсыздандыруу төгүмдөрүн төлөөнүн жаңы механизми иштей баштаганы маалымдалган.

Ошондой эле Салык кызматы эки санариптик сервисти ишке киргизген: «Салык Кеңеш» маалыматтык-маалымдама тутуму жана жасалма интеллекттин негизинде иштеген «AiSalyk» чат-боту.