Реестрдин ордуна консорциум: ишкерлер үчүн эмне өзгөрөт

Экономика жана коммерция министрлиги министрлер кабинетинин 2023-жылдын 22-мартындагы №155 токтомун күчүн жоготту деп таануу тууралуу токтом долбоорун коомдук талкууга алып чыкты. 

Документ ишкердик субъекттеринин экономикалык ишине жагымсыз таасирин тийгизген факторлордун жана аларды чечүү боюнча чаралардын автоматташтырылган электрондук реестрин түзүү жана жүргүзүү тартибин жөнгө салат.  

Маалыматка ылайык, жарлыкты жокко чыгаруу зарылчылыгы өлкөдөгү бизнести колдоонун институционалдык механизминин өзгөрүшүнө байланыштуу келип чыккан.

Буга чейин №155 токтом менен Экономика жана коммерция министрлигине Санариптик өнүктүрүү министрлиги менен биргеликте ишкердик субъекттеринин ишмердүүлүгүнө терс таасирин тийгизген факторлордун электрондук реестрин иштеп чыгуу жана ишке киргизүү тапшырмасы берилген.

Бирок президенттин жарлыгы менен 2026-жылы чакан жана орто ишкердик субъекттерин колдоо институттарынын Консорциуму түзүлгөн. Жаңы түзүм бизнести колдоо чөйрөсүндө мамлекеттик органдар менен өнүктүрүү институттарынын өз ара аракеттенүүсү үчүн координациялоочу аянтча болууга багытталган.

Консорциумдун негизги максаттарынын бири санариптик платформаны ишке ашыруу, чакан жана орто бизнести колдоо чараларынын бирдиктүү реестрин жүргүзүү болуп саналат. 

Тактап айтканда, консорциумдун ишмердүүлүгү төмөнкүлөрдү камтыйт:

• ишкерлер үчүн «бирдиктүү терезе» принцибин ишке ашыруу;
• чакан жана орто бизнеске көрсөтүлгөн колдоонун санариптик реестрин жүргүзүү;
• мамлекеттик органдар менен өнүктүрүү институттарынын ортосундагы өз ара аракеттенүүнү координациялоо;
• ченемдик укуктук базаны өркүндөтүү боюнча сунуштарды даярдоо;
• бизнести колдоо боюнча иш-чаралардын санариптик байкоосун камсыз кылуу.

Экономика министрлиги мурда каралган реестрдин функциялары консорциумдун жаңы иштөө механизмдерине натыйжалуу интеграцияланып жатканын белгилейт. №155 токтомду сактап калуу эки окшош санариптик системанын параллелдүү түзүлүшүнө алып келиши мүмкүн. 

Буга байланыштуу санариптик механизмдердин кайталанышын болтурбоо, бирдиктүү координациялык мамилени камсыз кылуу жана мамлекеттик ресурстарды натыйжалуу пайдалануу үчүн документти күчүн жоготуу деп табуу сунушталат.