Аз камсыз болгон үй-бүлөлөрдүн электр энергиясына кеткен чыгымдарын төлөп берүү сунушталды

Минкабдын токтом долбоору коомдук талкууга чыгарылды. Кенемте жөлөк пул менен бирге санариптик система аркылуу автоматтык түрдө берилет.

Компенсациянын өлчөмү калк үчүн колдонулуп жаткан тариф менен 1 кВт/саатына 50 тыйындык тарифтин ортосундагы айырма катары эсептелет. Жеңилдик электр энергиясын керектөөнүн белгиленген көлөмүнүн чегинде берилет:

• жай мезгилинде (1-апрелден 1-октябрга чейин) — айына 400 кВт/саатка чейин;
• кыш мезгилинде (1-октябрдан 1-апрелге чейин) — айына 700 кВт/саатка чейин.

Учурда «үй-бүлөгө көмөк» жөлөкпулун 41 695 аз камсыз болгон үй-бүлө алат. Алардын ичинен 39 652 үй-бүлө электр энергиясына берилген жеңилдиктерди пайдаланып келет.

Жаңы механизм учурда турак жайы же туруктуу каттоосу жок болгондуктан жеңилдик ала албай жаткан калган 5% үй-бүлөнү да камтууга жардам бериши керек.

Эмгек министрлигинин маалыматына ылайык, жаңы система жардамды даректүү жана жеткиликтүү кылат. Ошондой эле үй-бүлөлөргө жеңилдикти электр энергиясынын жеке эсебине байланыштырып кереги жок болот.