Орусия Кыргызстанга накталай рубль алып чыгууга чектөө киргизди: эмне өзгөрдү

Документке ылайык, жеке жактарга бул өлкөлөргө 1 млн рублдан ашык суммадагы накталай рублди алып чыгууга тыюу салынат.

Мында айрым өзгөчөлүктөр каралган. Белгиленген лимиттен ашкан сумманы өкмөт аныктаган айрым эл аралык аэропорттор аркылуу алып чыгууга болот. Бул үчүн чыгарылып жаткан акчанын бардык суммасы мурда акчаны алып чыгып жаткан адамдын банктык эсебинен алынганын тастыктаган банк көчүрмөлөрү болушу керек. Өкмөт ошондой эле тастыктоочу башка документтердин тизмесин белгилеши мүмкүн.

Буга чейин накталай акча алып чыгуу лимити 100 миң долларга барабар суммада болчу, ал эми чектөөлөр Азербайжан, Тажикстан жана Өзбекстанга жайылтылган эмес.

Жаңы эрежелер юридикалык жактарга жана жеке ишкерлерге да тиешелүү: аларга накталай рублди суммасына карабастан алып чыгууга тыюу салынат. Жарлыкта каралган айрым учурлар гана өзгөчө болуп саналат.

Эгер жеке жак тыюуну бузса, 1 млн рублдан ашкан накталай акча конфискацияланат. Ал эми компаниялар жана жеке ишкерлер эрежени бузган учурда, алып чыгып жаткан накталай валютанын толук суммасы конфискацияланышы мүмкүн.

Жарлыктын аткарылышын көзөмөлдөө Орусиянын Ички иштер министрлигине, Федералдык коопсуздук кызматына жана Федералдык бажы кызматына тапшырылды.

Жарлык 2026-жылдын 29-сентябрынан — кол коюлган күндөн тартып күчүнө кирди. Орусиянын өкмөтү Борбордук банк менен биргеликте үч айдын ичинде жаңы эрежелерге ылайык чет өлкөгө чыгарылып жаткан накталай рублдерди эсепке алуу тартибин бекитиши керек.

Эске салсак, Кыргызстандын Улуттук банкы коммерциялык банктарга эскилиги жете элек нак АКШ долларын алып чыгууга берилген уруксаттын мөөнөтүн дагы бир жолу узарткан.