Тапкан акчадан короткон каражат көп болбошу керек: чөнтөккө пайдалуу кеңештер

Акча топтоо азыркы заманда оңой эмес: бир жагынан кымбатчылык болсо, экинчи жагынан, бардык жерде - азгырыктар бар. Ошентсе дагы пайдалуу финансылык адаттарды калыптандыруу менен акча топтоону үйрөнүүгө болот. 

Акчаны дароо бөлүштүрүү керек 

Эгер өтө зарыл чыгымдар болбосо, акча алгандан кийин биринчи күнү каражатка тийбеңиз. Акчаңыз жоктой элестетиңиз. Бул убакыт аралыгында кандагы гормондордун таасири басаңдап, кырдаалга акыл калчап мамиле кылууга мүмкүнчүлүк түзүлөт.

Эртеси күнү милдеттүү төлөмдөргө керектүү акчаны бөлүп коюңуз: коммуналдык кызматтардын акысы, карыздар, балдардын окуу акысы. Андан кийин белгилүү бир сумманы акча чогултуучу жайга салып коюңуз.

Жада калса 1 000 сом болсо да, бул сиздин каражат коруңуз болот.

Акчаны конверттерге бөлүңүз

Күнүмдүк керектөөлөргө бөлүнгөн сумманы кийинки айлыкка чейин калган күндөрдүн санына бөлүү керек. Так тартипти карманыңыз: күн сайын эртең менен бир суткага эсептелген сумманы алыңыз же акчаны бир аптага деп конверттерге бөлүп коюңуз. Бул дем алыш күндөрү супермаркетке же базарга барып соода кылууга мүмкүнчүлүк берет. Болгону, соода кылып келгенден кийин колуңузда дагы бир аз акча калышы керектигин унутпаңыз.

«Ашып калган тыйындарды» чогултуп көрүңүз

Күнүмдүк же жумалык чыгымдардан кийин акчаңыз ашып калышы мүмкүн. Аны коротууга шашылбаңыз - арткан акчаны өзүнчө конвертке же өзүнчө эсепке салып коюңуз. Айдын аягында аны пландаштырылбаган, көңүлүңүзгө жаккан нерсеге жумшасаңыз болот.

Пайдалуу кеңештерди аткарыңыз

Көп адамдар «канчалык көп коротсоң, ошончолук көп табасың» деген принцип менен жашашат. Бирок бул дайыма эле иштей бербейт. Чынында, чыгымдардын көбөйүшү кирешенин өсүшүнө алып келет, бирок өз мүмкүнчүлүктөрүн толук пайдалана алган адамдар үчүн гана.

Бул азыр эле көбүрөөк акча таба ала турган, бирок ага мотивациясы жетишпеген адамдар. Алар үчүн чыгымдардын көбөйүшү мотивациянын жогорулашына жана кирешенин өсүшүнө түрткү берет.

Ой жүгүртүүңүздү өзгөртүңүз

Өз мүмкүнчүлүктөрүн толук пайдалана алган адам жашоосун жакшыртуунун жолдорун көрүп, аларды ишке ашырганы менен айырмаланат. Эгер азырынча сизде мындай мүмкүнчүлүк жок болсо, ага умтулуңуз! Бош убактыңызда чыгымдарды кыскартууга же кирешени көбөйтүүгө жардам бере турган ар кандай ыкмаларды ойлоп табууга болот.

Аларды дароо ишке ашыруунун кажети жок, жөн гана кыялданып, ар кандай варианттарды ойлонуп көрүңүз. Бир аз убакыт өткөндөн кийин сөзсүз ишке ашырууга боло турган реалдуу жолдор табылат. Сиздин милдетиңиз - аларды иш жүзүндө сынап көрүү.

Өзүңүз бойдон калыңыз

Чөнтөккө туура келбеген кымбат, беделдүү буюмдарды сатып алып, айланаңыздагыларга өзүңүздү байыраак жана ийгиликтүүрөөк көрсөтүүгө аракет кылбаңыз.

Башка материалдык абалы жана жашоо образы бар адамдай көрүнүүгө умтулуу көп учурда акча жагынан гана эмес, күч-кубат жагынан да кымбатка түшөт.

Мындай учурда айланаңыздагылар сиз жөнүндө эмне деп ойлой турганына дайыма тынчсызданып, жаңы образыңызды сактап калууга аракет кыласыз. Бул болсо акчаны, күчтү жана убакытты талап кылат. Ошол эле учурда бул күч-аракетиңизди жеке өнүгүүңүзгө жумшасаңыз болмок.

Соңунда дагы бир кеңеш: айлыктан айлыкка чейин жашоо адатынан жана ашыкча талаптардан арылыңыз, «табитиңизди» тыйып, чыгымдарды көзөмөлдөөнү үйрөнүңүз. Эгер муну жасабасаңыз, жогорку маяна алган адис болсоңуз да, эч качан акчаңыз жетиштүү болбойт.