Мындан ары мамлекеттен 1 млрд сомдон жогору долбоорлор колдоо ала алат

Финансы министрлигинин маалыматы боюнча, тиешелүү токтом 2026-жылдын 13-апрелинде кабыл алынган.

Мындан ары мамлекеттик кепилдиктер 1 миллиард сомдон кем эмес же чет элдик валютадагы эквиваленттүү долбоорлорго гана берилет.

Бийлик муну инвестиция тартууга жана өлкөнүн экономикасын өнүктүрүүгө жардам бере турган стратегиялык маанилүү демилгелерге колдоо көрсөтүү каалоосу менен түшүндүрүүдө.

Жаңы жобо ошондой эле мамлекеттик кепилдиктерди берүүнүн бирдиктүү тартибин киргизип, аларды берүүнүн шарттарын, лимиттерин, эсепке алуунун жана милдеттенмелерди аткаруунун тартибин аныктайт.

Министрлер кабинети документ ачык-айкындуулукту арттырып, долбоорлорду тандоону жакшыртат жана мамлекеттин финансылык милдеттенмелерин натыйжалуу башкарууга жардам берет деп эсептейт.