Токтогул районунда опузалап акча талап кылууга шектелгендер кармалды

Текшерүүнүн жыйынтыгында, аталган факт боюнча КРнын Кылмыш-жаза кодексинин 208-беренеси («Опузалап талап кылуу») менен кылмыш иши козголуп, ыкчам-тергөө иш-чаралары жүргүзүлгөн. Бул тууралуу ИИМдин басма сөз кызматы билдирди. 

Жүргүзүлгөн иш-чаралардын алкагында бул кылмышка тиешеси бар деп күбө катары 7 жаран тергөө бөлүмүнө жеткирилип, сурак жүргүзүлгөн. Аныкталгандай, алардын айрымдары уюшкан кылмыштуу топтун мүчөлөрү катары ИИМдин ыкчам каттоосунда турган.

Тергөө иштеринин жүрүшүндө, алардын ичинен бир нече жолу соттолгон 1996-жылы туулган К.Э. жана 2002-жылы туулган М.Ш. аттуу жарандар аныкталып, убактылуу кармоочу жайга киргизилди.

Учурда кылмыш ишинин бардык жагдайларын тактоо жана башка тиешеси бар адамдарды аныктоо боюнча тергөө амалдары улантылып жатканы кошумчаланды.