Улуттук банк 202,7 млн доллар өлчөмүндө ири масштабдуу интервенция жүргүздү

«Улуттук банктын валюта рыногундагы операциялар» бөлүмүндө финансылык жөнгө салуу орган төмөнкүлөрдү билдирди:

• 20,9 млн АКШ доллары бүтүмгө келишилген күндөгү эсептөөлөр менен ишке ашырылды;
• 181,8 млн АКШ доллары бүтүмгө келишилген күндөн башка күндөгү эсептөөлөр менен ишке ашырылды.

«Ушул жылдын башынан бери Улуттук банк жалпы суммасы 1 миллиард 668 млн АКШ долларын түзгөн интервенцияларды жүргүздү. Улуттук банктын ички рыноктогу валюталык интервенцияларынын көлөмү өлкөбүздүн реалдуу секторунун кеңейишине шайкеш келерин белгилей кетүү маанилүү», - деп билдирди КРнын Улуттук банк башкармалыгынын төрагасынын орун басары Азат Козубеков 25-августтагы маалымат жыйынында.

2026-жылы Улуттук банк төмөнкү суммаларда 10 валюталык интервенция жүргүздү:

• 134,05 млн доллар;
• 109,95 млн доллар;
• 162,55 млн доллар;
• 140 млн доллар; 
• 178,9 млн доллар;
• 168 млн доллар;
• 170,2 млн доллар;
• 222,55 млн доллар;
• 186,4 млн доллар;
• 196,2 млн АКШ доллары.

2026-жылдын башынан бери жүргүзүлгөн 11 интервенциянын жалпы суммасы 1 миллиард 871 миллион 500 миң АКШ долларын түздү.

Эске салсак, 2025-жылы Улуттук банк жалпы суммасы 853 миллион долларды түзгөн 8 интервенция жүргүзгөн.

2020-жылдан 2025-жылга чейин Улуттук банк 107 интервенция жүргүзгөн. Алты жыл ичинде жөнгө салуучу валюта рыногуна дээрлик 3,8 миллиард АКШ долларын саткан.